連續兩季成績未達標，收到兩大封警告信的練馬師李易達，任何一季再唔夠數，就要被OUT出局，所以今季達哥開行Turbo，全力搶攻，努力亦換來回報，暫時李廐已贏了9win，養馬運亦增至41匹健康水平，尚欠六場才贏夠15場上岸，唔係冇希望。
起碼今期(1日)李廐就有隻矚目新星上陣，就係第六場三班1000米嘅「炸魚薯條」，好多馬迷都知隻馬晨課表現佳，但未必知馬主蔡曼恩，就係香港前騎師嚴顯強的太太。蔡曼恩之前首匹愛駒叫「歌聲飛揚」，如今「炸魚薯條」呢個馬名大纜都扯唔埋，究竟點解呢？
聽李易達講，當年蔡曼恩去英國留學，唔算有錢，認識當地一位騎師朋友，嗰位騎師畀貼士佢，馬名正係叫Fish N'Chips(炸魚薯條)，結果爆冷贏馬，贏得彩金幾千英鎊之多，令蔡曼恩難忘，所以佢現在亦將愛駒改名為「炸魚薯條」。
講番呢匹馬，在港首次試閘已能勝出，有前有後走勢相當純熟，又夠集中；1月6日再試閘，同樣表現出色，由頭放到尾跑第一，狀態絕不成問題。今次在港一出即報爭仁愛堂盃，蔡曼恩隨時同丈夫嚴顯強一起捧盃！