今年渣馬已告一段落，但估唔到彈咗另外一樣嘢出嚟，冇錯就係Puma嗰單D7689選手編號風波，整件事充滿住荒謬，首先藍屍Clement Wong竟然得閒到寫信插「飄麻」，其次飄麻大佬又真係道歉，三者仲要刪post。講真三樣嘢同時喺香港發生已經成為「完美恥笑對象」，所以小弟都頂唔順改咗首「D74689」（原曲係城城嘅《我為何讓你走》）將此事存檔，失禮。
呢樣嘢如果發生喺李寧牌或者特步牌，大家絕對唔會驚訝，仲會覺得非常合乎常理，就好似大陸會好刻意避開「六四」兩個數字。此乃我國邏輯，自明朝朱元璋到清代康雍乾，好多擦鞋仔靠文字獄，屈人唔尊敬皇上再抄人家上位，勢估唔到呢類封建奴性會延續到今日香港，仲要係體育賽事。我知，飄麻已經解釋咗係改圖，如是者，更加唔使刪，完全唔需要做任何嘢。
早排上生果遇徐緣，即討論呢壇公關暨「孖劇亭」事件，一言驚醒，飄麻簽至大粒代言人，乃飛人保特，slogan就叫Forever Faster，體育人永遠不妥協求突破，如今變Forever Fasten，悲哉。除此，巴神呢個癲佬都夠膽簽，已經係品牌本身態度，須知道巴神大把是非又鹹濕加把口唔收，又如何？體育界壞孩子多的是，唔反叛又點成為競技傳奇？adidas今次其實可以冷抽一棍，post張家輝廣告︰怯，你就輸一世。
梁栢堅
填詞人+彩池人