一月二十六日，印度領事館在香格里拉酒店舉行茶會（全場冇酒飲）慶祝印度共和國六十五周年國慶，左丁山收到請帖，欣然赴會。左丁山只去過印度一次咁多，同印度無甚聯繫，點解會接到請柬？諗咗一輪，先至記得2014年3月沙田馬場舉行打吡大賽，簡文樂例牌在沙田馬會會所包咗六樓全層招待朋友及外國領事觀賞賽事，啱啱左丁山就坐在印度總領事Agrawal先生隔籬，大家互換名片，交換時事意見，估唔到佢仲會記得，外交官啲公關手腕，果然了得。話咁快，簡文樂又送來請柬，三月十五日係打吡之期，到時又有得玩。
香格里拉酒店宴會廳內，站滿印度國民，香港人係極少數，一入去就碰到昔年上司「戴德禮」（左丁山為佢繙譯之中文名字）嘅外甥Sunil，想當年，Sunil跟左丁山做暑期見習生，學習何謂證券債券，依家佢已經係亞洲創業投資／私募基金界嘅知名人物。Sunil介紹一啲朋友俾左丁山相識，皆中環財金界高層，印度人在國際銀行管理層佔有不少份額，香港人瞠乎其後。
據Sunil講「印度國慶日」有大型茶會，今年係在港第一次，以往領事館奉行節儉原則，一向十分低調，自新總理莫迪上台後，政府一改作風，要求駐外主要城市人員全面推廣印度旅遊及投資環境，希望吸收外資及外匯，去年到印度嘅遊客，聽講只有七百萬人次，相等於香港人口；但香港全年有六千一百萬名遊客（其中一半來自中國大陸），遠遠超過印度。Sunil話印度有十二億人，國土面積遼闊，旅遊古蹟眾多，冇理由只得七百萬遊客咁少嘅，在新總理領導之下，印度旅遊業必定有飛躍進展。又有咁啱嘅，前幾日香港旅發局主席林建岳在福臨門請傳媒食午飯，用自己私藏紅酒（好鬼正）款客，認真唔話得，呢位主席似乎係全職為旅發局打工兼冇糧出，仲周不時自掏腰包請客，有如此人物為公職服務，算特區政府夠運。林主席話睇好印度經濟有好勢頭，中產階級湧現，旅發局在2015年會多撥資源在印度宣傳香港，希望吸引多啲印度客來港。唔，港印旅遊一條心，希望互惠互利啦，特區政府亦幾重視印度關係，林鄭月娥到場祝賀印度國慶，曾鈺成、曾德成、陳茂波、吳克儉等人亦到場，認真識做。