嚴秋華十五歲開始在辛尼哥哥（黃汝燊）主持的《跳飛機》扮怪獸，當年愛搗蛋又調皮的他，今日已是年屆五十六的白髮中年，二十二年前轉行做速遞員，年前擢升為速遞公司總監，事業家庭樣樣美滿。
當年怪獸深受小朋友歡迎，但背後原來有段辛酸史：「嗰時諗嘢好單純，覺得好難為情，唔開心，點解我冇樣見得把聲？但同辛尼哥哥同埋小朋友一齊嘅時間係好開心嘅。我覺得我做怪獸做得幾好㗎，幾活潑，換咗第個人做可能唔係呢個效果。」
不合作運動撐辛尼
《跳飛機》越做越紅，各式各樣商品甚至地產商也爭相拉攏辛尼哥哥合作，結果樹大招風，無綫認為辛尼哥哥蠶食公司利益，突然將他踢出《跳飛機》，換上王愛明和黃造時，嚴秋華跟飛機仔飛機女於是玩「不合作運動」宣洩不滿。嚴秋華說：「係有啲唔合作，嗰個月隻怪獸冇咁活潑，好似病咗咁。細個唔識諗，只覺得唔公平，點解唔畀辛尼哥哥做？又唔係做得唔好，如果咁，我哋都唔做啦！」
昔日小朋友放學回家睇電視習慣，已變成對住電腦或手機，連嚴秋華八歲的囝囝亦如是。嚴秋華說：「我個仔都冇睇兒童節目，佢都係返去溫書之後上網睇電腦。」
不少怪獸家長想子女贏在起跑線，但嚴秋華拒絕再做「怪獸」：「我唔想佢學咁多嘢，要留番啲時間去玩，小朋友冇得玩好唔公道，太過強迫對小朋友心智唔好，影響成長發展。我唔會做怪獸家長，唔係學得多識得多就無敵，我個仔兩歲幾，一入學校就喊，離遠見到學校門口喊，去搭車又喊，我話唔好要佢返學啦，嗰啲時間應該喺屋企，等佢舒服過一個好童年。我都同老婆講，係咪想佢早啲讀書早啲出來做嘢養你？唔係使咩咁早讀書？」