究竟身兼多項公職，包括監警會同禁毒常務委員會委員嘅鄭承隆Edwin，仲係唔係新民黨副主席呢？八方早前喺食飯場合撞過Edwin，問過佢離開新民黨後，會否加入其他政黨組織？佢好似有創傷後遺症咁，話唔敢輕言入黨。
點知上周六新民黨黨慶場刊內，佢個名竟然繼續同田二少並列副主席，其後黨主席葉太仲同傳媒講，冇紀錄收過Edwin退黨申請，話可能新民黨工作有好多文件要處理，Edwin唔係好適應，先唔係好夾得嚟！
噚日八方又見到Edwin，佢話老實講，真係冇「申請」，但幾個月前已經畀咗信個黨，話要離開，原因係「我接受唔到田北辰嘅做法」。佢笑言「唔係黑社會，易入難出吖嘛？」又話「如果主席覺得田北辰係一件死物，係文件，咁我接受唔到呢件文件囉！」但佢強調好尊重葉太，多謝佢嘅照顧，但處理唔到件「死物」。
Edwin話唔想喺收唔收信問題上爭拗，諗住或者搵律師出信畀新民黨，話佢已經畀咗封信話明退黨，請有關負責人將佢個名剔除於黨籍之外。