八方一直覺得建制派議員好愛立法會，全面貫徹「立會是我家」嘅精神，當正議事廳係自己屋企，所以有人寫大字、有人瞓到流晒口水、甚至連挖鼻窿都有！但咁都未算，噚日黃定光竟然喺議事堂入面「啪啪啪」咁剪指甲，仲用粗口怒X投訴嘅范國威，唔知仲以為立會議事廳係黃定光屋企大廳。
話說立會財委會噚日傾漁業發展貸款基金撥款，咖喱范發覺有啲「啪啪啪」聲響，維持咗幾分鐘，咁佢就梗係奇怪邊個喺議事廳「啪啪啪」，仲周圍望吓邊個「啪啪啪」，當佢喺會議中途去洗手間，經過黃定光後面，畀佢睇到黃定光喺度剪指甲，「啪啪啪」怪聲係剪指甲聲！到咖喱范去完洗手間行入會議廳，發覺黃定光剪完指甲，但就拎個指甲銼出嚟銼靚自己啲手指甲，到佢發言時，就炮轟黃定光唔該喺會議廳做呢啲「核突嘢」，影響議會尊嚴同形象。
要保安出手分隔
後來咖喱范喺休會期間離開會議廳，見到黃定光與黨友從洗手間出來，黃一見到范，即用「D7」諧音嘅粗口問候咖喱范，咁范立即大聲追問黃定光，點解用粗口鬧佢，兩人更展開罵戰，黃一句「點解你要話我剪手指甲？」范一句「因為你剪手指甲唔啱」，最終兩人要保安出手分隔。
事後八方問黃定光為乜開會「啪啪啪」剪指甲，佢話「我指甲崩咗，梗係要喺會上剪啦，關佢乜事？」又話唔知乜叫粗口喎。佢個黨友元秋話，對於今次「糾紛」，「唔知可以講乜嘢」，又笑指自己「好彩冇聽到啪啪聲」！
李八方
mailto:[email protected]