【童夢傳真機（三之一）主持篇】「叮噹」林保全走了，兒童節目Icon譚玉瑛被調走，無綫兒童組慘遭連根拔，連播足十年的《放學ICU》也「壽終正寢」。時代越進步，失去的童真越多，往昔童真歲月，只能回味。還記得那些年陪大家跳飛機的怪獸嚴秋華？今日他已變成白髮中年；跟周星馳在《黑白殭屍》鬥爆肚的白殭屍龍炳基，在美國當上食神；還有《閃電傳真機》的唐韋琪、蔡子健、魯文傑和伍文生幾位大哥哥大姐姐，今日都已是年過四十的Uncle 、Auntie；三代主持三段往事，都是我們兒童節目快樂印記。
撰文：戴彩煥
早已各散東西的《閃電傳真機》主持蔡子健、魯文傑、唐韋琪和伍文生，相隔十多年後再次重聚，當年的大哥哥大姐姐，今日都已年過四十，蔡子健轉行做了財務策劃師、去年當上爸爸的魯文傑約滿港視後現於演藝學院修讀戲劇教育碩士課程、唐韋琪開設了才藝訓練中心教小朋友唱歌舞蹈技巧，至於已有三子女的伍文生亦轉行搞飲食。
四個老拍檔一見面有說不盡的話題，回味着《閃電傳真機》人人爆騷爆到七彩、兒童節目最輝煌的開心年代。子健說：「以前好多外景，介紹香港唔同地方，內容好豐富，好似縮水版《歡樂今宵》，主持轉好多造型，用新人角度睇，係一個好好訓練機會。」唐韋琪亦說：「成個社會好重視兒童節目，當年有個《空中暢遊》環節，俾未坐過飛機嘅小朋友坐飛機食飛機餐，佢哋話原來食飛機餐係咁快！」
兒歌頒獎禮難撲飛
當年兒童節目盛事，絕對是一票難求的《兒歌金曲頒獎典禮》。伍文生說：「勁過晒《獎門人》，兒歌頒獎禮一年一次，為咗你嘅細路，你會去撲飛，同埋當年好多歌手爭唱兒歌。」
隨着時代步伐，兒童節目已淪為電視台「例行公事」，製作費龐大的兒歌頒獎禮及外景拍攝早早被叫停。唐韋琪慨嘆：「小朋友返全日制，放學時間根本銜接唔到播放時間。」密集式的功課、補習和手機娛樂，令小朋友睇兒童節目時間大大減少，更重要的，是節目內容已追不上家長所需。子健說：「𠵱家家長要求又學英文法文日文同唔同樂器，仲睇個叔叔扮細路？𠵱家節目少咗啲童真，變得現實咗。𠵱家啲小朋友係都去遊學團啦！」
不忿譚玉瑛被踢走
譚玉瑛做了三十二年兒童節目，去年因為電視台要年輕化而被踢出局，跟譚玉瑛曾共事多年的魯文傑實在看不過眼：「佢總有一日會退落嚟，但呢個係咪適當時機我有保留，我覺得唔係咁好睇囉！睇到阿譚喺《東張西望》揸咪牌出街，我真係嬲，以為佢坐枱，唔係喎！有冇搞錯？真係火都嚟，好肉酸！」唐韋琪亦指：「冇咗譚玉瑛好似唔係好習慣，等於香港有啲地方歷史見證情懷，政府突然要鏟走去，感覺唔係咁好，佢嘅存在，有一種精神喺度。」譚玉瑛被踢出局後，無綫兒童組亦慘遭「連根拔」，魯文傑形容為「滅門」，唐韋琪亦慨嘆「不近人情，冇人情味」。
儘管大家不捨，但一刀切，卻是今日要面對的殘酷現實。
協力：卓寶花
場地：唐韋琪才藝訓練中心
