噚日落去跑馬地，行行吓見到前副領隊肥全滿頭大汗，我問佢咩事咁急，佢話收到好料，叫捧澳洲（黃衫）喺亞洲盃主勝實冇走雞。佢話南韓以一球不失嘅姿態殺入決賽，基本已經證明佢哋留前鬥後嘅策略係成功咗大半，但要繼一九六○年後再次捧起亞洲盃，真係唔係咁容易。
東道主澳洲氣勢如虹，有傳上海申花正力斟緊老將卡希爾，三十五歲高齡仍然可以喺大賽證明自己實力，佢哋全隊個個都入到波，又佔地利，加上少林袋鼠兵都話今晚坐定定睇電視，見證澳洲稱王，主勝穩陣啦！另一場係聽日大清早南美波，智利大學對安圖法加斯達「入球大細」要「大」，智利大學係智利嘅傳統勁旅，本身已經夠勁，今季仲有前鋒柏迪斯奧魯比奧大勇。對住喺首階段聯賽表現麻麻、排到去尾二且曾經四場不勝嘅客軍，數多幾球都冇問題喎。
講完聽日啲波，肥全話趕住走，但急都要問兩句，最近聽過同甲組快活谷搞緊啲嘢，連豬仔同阿迪都出埋嚟，仲有當年倫爺接班人大吉都過嚟幫手，佢見我咁關心快活谷於是乎停低腳步拉我埋一邊，「領隊！都唔知係唔係霍老喺下邊見到自己心血俾人玩到冇超聯不特止，落到甲組都要包尾，所以托夢肥中周圍搵人，有錢出錢，有力出力，所以除咗搵港車仔出教練幫手，過氣踢得都要行出嚟。聽日對葵青搶分戰不勝無歸！」希望快活谷救得到啦。
本地職業領隊
耳聽八方 專收好料