五十二歲的龍炳基移民美國轉行做廚師二十多年，因為八十年代拍住周星馳在《430穿梭機》中《黑白殭屍》搞鬼的演出，龍炳基這個名字到今天仍不時被提起。
星爺當年做兒童節目經常爆肚和恰細路，尤其《黑白殭屍》中小肥仔經常被恰，身在美國的「白殭屍」龍炳基在電話中笑說：「星仔唔係蝦佢，係想打佢！個肥仔當時幾紅，冇乜時間畀我哋，加上小朋友工作時間有限制，凡親有佢，我哋就好頭痕，要等佢就佢收工，覺得真係麻煩，可以講星仔同我哋出頭。」
有指星爺無厘頭文化其實源於《黑白殭屍》，龍炳基笑說：「監製要我哋將角色生活化，做番自己，有時見劇本唔係好跟我哋性格，所以對劇本時就改少少啫。《黑白殭屍》其實唔係畀兒童睇，係畀大人睇。做兒童節目做到去到紅館，你話犀唔犀利？」