立法會內務委員會噚日討論，是否應縮短立法會大會開會時間，以後將不能夠晚上十點完成嘅會，提早到晚上八點完成，第二朝至再返立法會開過。白鴿黨單仲偕反對呢個建議，認為建議縮短議員發表意見同辯論時間，叫立法會秘書處不如請多啲人好過，不過都有部份泛民政黨，好似公民黨同工黨就贊成縮短時間。
而建制派就食住單仲偕上，借呢單嘢寸白鴿黨係上周流會時，一個人都冇在席，保險界議員陳健波更指泛民「好虛偽」。社民連長毛不忿陳健波言論，會上大鬧建制派，叫佢哋立即辭去人大政協職位，咁以後立法會就唔使休會畀佢哋上京開會，但長毛俾內會主席梁君彥以未獲批准即不停發言為由，趕佢離場。立法會最終以四十九票贊成、十六票反對通過縮短開會時間建議，最終決定要由立法會主席曾鈺成作出。