呢排流感大爆發，連醫管局主席梁智仁都中招。佢噚晚有出席喺聯合醫院一處風涼水冷草地舉行嘅傳媒聚餐，照食肥膩炭燒乳豬，佢話已經好番啲，所以冇戒口照食，仲話好好味。
講開食，正所謂物似主人形，梁主席隻愛犬Miss Muffin，都係好為食。梁主席話前日Muffin小姐六歲生日，佢特登整碟紅蘿蔔伴牛扒飯畀Muffin（圖），「佢好開心，食到隻碟好乾淨」。梁主席對Muffin向來好捨得，前年同梁太去英國旅遊一個月，都帶埋佢去，皆因佢哋當「鬆餅小姐」好似係親生女。
咁牛扒會唔會係頂級5A和牛先？梁主席就唔肯講，只話係靚嘢啦。