佔領行動的「東防」召集人劉偉德，早排同佔領區義工會組成「拾念」組織，話要參選區選後，據知唔少泛民中人，都對呢個組織存在疑問，包括點解可以咁犀利、咁短時間內籌到二百萬，用嚟幫啲無黨派人士參選，甚至不排除挑戰泛民區議員？有泛民中人更話喎，唔明點解劉偉德過去高調出任「東防」召集人，之後卻未有如唔出名嘅學聯二、三線成員、或泛民議員助理一樣，往返內地時受阻？
花生友噚日打畀劉偉德了解過，佢承認過去喺大陸做教育生意，所以九月至十月佔領期間，自己經常往返大陸，但自從十一月中起，為免影響生意拍檔，已經退股，並由十二月起至今未再踏足大陸。佢仲話聽聞其他防線大佬都上到大陸，所以成件事好正常咁話喎。
劉偉德同時解釋，籌到二百萬元嘅基金，同「拾念」呢個組織係兩回事，「拾念」只係負責幫啲未成為候選人嘅人士，喺提名期前提供人手、街板、大聲公等支援，到提名期完結正式成為候選人後，基金先會提供金錢援助。佢透露，目前正就基金成立公司，強調捐款來自不同人士，每人最多限捐十萬蚊，所以唔存在金主操控組織情況喎。
至於泛民最擔心嘅「𠝹票」問題，劉偉德話組織主要係想狙擊建制派，強調同泛民競爭唯一情況，係泛民根本無勝算、而新參選人士有機會當選，強調絕不支持參選人為「𠝹票」同「攬炒」去馬，因為泛民無論點講都好， 都係雨傘運動同路人喎。
花生友