列基美掛靴，代表球壇僅餘嘅古典進攻中場已經冇晒，不禁令人懷緬過去。如果今日嘅美斯都俾人叫「散步帝」嘅話，咁列基美肯定係叫「散步上帝」，因為列基美真係唔會點防守，速度唔高，又唔大隻，但佢喺進攻上嘅瀟灑，同埋嗰種控制全局嘅淡定，真係令人讚嘆。
一支球隊要發揮列基美（圖）嘅能力，一定要搵佢做核心，就好似當年嘅維拉利爾同埋德國世盃嘅阿根廷國家隊。你要預咗列基美唔會點跑，佢係負責攞住個波，之後放波派牌，畀波喺佢身邊周圍跑嘅隊友。不過，喺𠵱家嘅足球世界，已經唔多見呢種球員，因為時移勢易。𠵱家係跑動為主嘅時代，越跑得多、節奏越快、壓迫越強嘅球隊先係呢個時代嘅寵兒，強隊已經唔再容許畀一個球員企定定慢慢踢波。因為喺呢個跑動嘅時代，少個人跑，就同踢少個冇分別。同埋，防守係全體球員嘅工作，要由前鋒做起，所以𠵱家做進攻中場都要識防守。
足球戰術呢樣嘢，其實就好似捉棋咁，當對手見到列基美呢啲進攻中場好勁時，自然會諗方法去剋制。進攻中場嘅活動範圍係對手後防同中場線之間，但隨4-2-3-1陣式或者雙防中興起，更多球隊屯重兵喺中路防守，變相壓縮咗技術流進攻中場嘅生存空間。就算𠵱家有呢類球員，可能都會被安排踢邊。
文：咖喱