試想想當米高基頓（Michael Keaton）憑《飛鳥俠》（Birdman）奪奧斯卡影帝之際，有記者告知身在地球另一端的蛋散，居然將其超班演技跟一名中國演員混為一談，情景會是何等荒誕。實情最荒誕是，蛋散最初只想寫篇諸如「《飛鳥俠》是一部好電影」等行貨交差，但想到自己不是寫影評材料，影評又通街都是，況且識睇，梗係睇仰止《蘋影話》啦。碰巧有套本土電影《鴨王》上映，既然是雞雞鴨鴨題材，何不將兩者亂扯一通？米高基頓，就請你將就一下。
同是天涯淪落人
然而，蛋散耍小聰明是要付出代價。杜秋棠發夢也沒想到，居然會為這專欄，男人老狗晨早流流狗衝戲院睇鴨，仲要係歡樂早場，明明女人先好呢味吧？好了，就當我鹹濕，擺明車馬睇袁嘉敏那幾場裸命戲，但你能怪別人用奇異眼光審評我嗎？杜秋棠想說，身為票務員的你，若看到這裏千祈咪爆響口，說那思思縮縮蒙頭入閘的麻甩佬，正是小弟。亦感激老細給予我這吞泡機會，我會好好記住的。
若硬要將準奧斯卡影帝米高基頓和影壇初哥何浩文（Dominic）去比較演技，根本對兩人都不公平。就正如你在記協盃數了兩糊，也不會高呼自己勁過費托一樣。不過兩人在戲中的角色，除了一個飛鳥俠，一個巨鳥俠（笑）之外，兩人背景其實幾似。米高基頓飾演的過氣影星Riggan，唔想再做超級英雄，學人搞舞台劇，結果瀕臨破產邊緣，同女兒關係差，自己則活在昨天，終日幻想有超能力；Dominic扮演的阿鋒仲衰，老竇欠人周身債，阿媽病到七彩，自己又讀唔成書，唯一天賦異稟，做鴨似乎係眼前唯一出路。一句講晒，同是天涯淪落人，都須要找到自我身份的認同。
山窮水盡爆潛能
我們不是富二代，沒有飯來張口，女來張手的權利。我們在社會所扮演的角色，只能從僅有的專長或本錢中挑選，根本不是平日玩RPG般任你揀，更不設砍掉重練系統，人生就是冇take two，揀錯路便返不了轉頭。所以當米高基頓認定要做好Raymond Carver套舞台劇，便要不惜一切去實踐，借頭借路換走男主角，又為自己加插戲份。Dominic亦一樣，既然決定拋身來做，就一定要做鴨王之王，既要拜師學藝（單立文做鴨王冇得輸），又要苦練潛修（口技手技）。人在山窮水盡時，潛能就會大爆發。
其實米高基頓和Dominic最相似地方，我指角色上，是兩者都要放下自尊、面對現實。《鴨王》最有價值的對白（應該係唯一有價值），是單立文對Dominic的忠告：「你想做鴨王，首先唔好以為做鴨好風光，做鴨係服務性行業，你就要放下自尊服侍人。」之後Dominic不再奄尖腥悶揀客接，豬扒奇葩一樣服侍得貼貼服服。
米高向現實妥協
米高基頓去得更盡，他一直死守那所謂「演員尊嚴」，徹底放棄榮華富貴，卻被女兒鬧醒：「你是個不存在的人，你一點也不重要！」結果他放下身段，光脫脫在時代廣場外跑了一圈，又低聲下氣哀求劇評家筆下留情，最後甚至豁出去，用真槍怒轟自己鼻子。這些都是對現實的一種妥協。
終於來到謝幕，零星觀眾（清一色單拖男）陸續散場，大家你眼望我眼，很是曖昧，我不敢確定他們入場到底係睇袁嘉敏？Jeana？Hazel？定係Dominic。我大搖大擺的走出戲院，之前的慌失失感一掃而空。相比起米高基頓和Dominic，這丁點兒尷尬又算得上甚麼？
畢竟在他們面前，杜秋棠只是一頭小鳥。
【慌張西望】
撰文：杜秋棠
原諒我只是一部國產抽濕機。
https://www.fb.com/freakingwestlook
本欄逢周五刊登
