呢排狀態大勇嘅騎士周三主場迎戰拓荒者，勒邦占士（LeBron James）因為手腕有傷冇打，今場只係坐喺場邊做觀眾。不過，各位球迷依然有場超級好戲睇，仲未鎖定明星賽參賽資格嘅控衞K艾榮（Kyrie Irving），爆seed狂入個人新高嘅五十五分，幫騎士以99:94贏波，亦將球隊連勝紀錄增加到八場。
大佬占士休戰，「二佬」K艾榮今場就孭隊波上身，狂轟十一球三分波，包括完場前六秒幾嘅奠勝三分，全場計入夠五十五分，刷新個人職業生涯得分紀錄。做觀眾都high到爆嘅占士，賽後就寫包單，話之前贏唔到球迷投票做正選嘅榮仔，攞硬下個月張明星賽入場券㖭。
榮仔賽後自然成為各個媒體爭相訪問嘅對象啦，不過呢位焦點人物好謙虛咁話：「大家都只係問我有咩感想，老實講我真係唔關心；最緊要係隊波打得好，今場無論係進攻定防守，都可以謹守賽前訂落嘅戰術。我可以喺啲fans同成班隊友面前發揮得咁好，但最開心都係可以贏波。」
占士大讚「The Truth」
由於靠射絕殺響朵嘅黃蜂控衞K獲加（Kemba Walker）養緊傷，同佢爭位嘅榮仔要以後備身份入選明星賽，基本上都冇咩懸念，不過係咪真係擔當得起占士讚佢係「The Truth」咁勁，起碼睇埋周五對帝王場波先講啦。（now678台明日8:30am直播）
識睇，一定係睇足英台【英波Live】：
http://soccer.appledaily.com
http://bit.ly/engballlive