唔少市民噚日晚上七點擔定凳仔，等睇梁特次女梁齊昕喺有線娛樂台節目《我係梁齊昕》爆料訴心聲，結果齊昕大爆老竇多次叫佢刪除facebook，唔想佢「咁癲」，又話最唔鍾意父母管束佢交啲乜嘢朋友。八方相信齊昕仲有好多心底話要講，但有線電視竟然分開七集播，每集僅五分鐘，難怪有口痕友訕笑有線「lam」到盡。
戴值五萬名錶上節目
唔知係咪因為首度上電視，齊昕喺訪問中似乎有啲緊張，而自小都喺英國留學嘅佢，廣東話唔多正。續以粗眼線濃妝示人嘅齊昕，被主持問到不時同網民開拖，事前有冇同父母傾過時回應：「哈哈（搖搖頭），唔會，佢邊度有時間？我爹哋之前連fb都唔知係乜啦。」
咁老竇有咩意見畀佢？齊昕話：「叫我delete咗個account……好多次㖭。」原因係想佢低調啲，「唔想我咁癲，咁言行出位，咁crazy」，又自稱同阿哥細妹好唔同，說時不住搖頭苦笑。
佢自言對父母嚟講麻煩又反叛：「咁我同佢哋世界觀唔同，generation gap。」認為自小喺英國讀書，「嗰邊可能睇法開放啲，我屋企又比較中國啲傳統啲」。原來佢最唔鍾意父母管束佢交朋友：「我好唔鍾意佢哋judge我啲朋友，呢樣嘢我會好嬲」，透露雙親睇佢啲朋友，只在乎對方讀書成績、家庭背景、讀牛津定劍橋，但佢完全唔睇呢啲嘢。
訪問播出前，齊昕仲喺fb上載短片，片中嘅佢手持「龍蝦鉗」玩具，藉此呼籲全港市民收睇佢嘅節目，似乎好重視呢次粉墨登場。而十隻手指同腕都戴滿飾物嘅齊昕，仲戴住一隻價值五萬一千蚊嘅Ballon Bleu de Cartier手錶，唔知係咪CY送畀佢嘅禮物？
李八方
mailto:pf_lee@appledaily.com
