【本報訊】智能手機盛行，引發一場的士電召手機App大戰，隨着Easy Taxi敗走，有的士司機指港人習慣隨街截的士，加上之前安裝Easy Taxi卻發現該App的定位不準確，不看好的士App前景。現時主導市場的是去年九月加入戰團的「快的TAXI」，該公司正大灑金錢一千五百萬元，向乘客及司機發補貼搶客。
一日三次中空寶
現時不少的士司機同時下載多個App，即是同時在街中兜客，又靠App找客，希望有生意保障。不過曾經安裝的士App之的士司機指，的士App公司先要改善定位問題，姓鍾的士司機指Easy Taxi的App經常定位出錯，「我喺九龍海邊，就當咗我喺港島，我喺東區走廊，就當我喺尖沙嘴，畀啲九龍柯打我，試過幾次出錯。」他又指，使用電召App要經常留意手機屏幕，有柯打又要按手機，擔心發生危險，用了兩星期便刪除。
另一名姓陳司機試過一日三次中空寶，「兩個不同電召App出現同一個乘客，我去緊途中，個客取消叫車，因為上咗第二架車，感到好混亂」。對於Easy Taxi撤出香港，快的TAXI香港負責人吳澍基稱現時對手只剩下美國的UBER，他指本港平均每日的士載客量達一百萬人次，仍有很大市場潛力，現時快的TAXI及UBER埋身肉搏，彼此都有推出優惠吸客。
■記者郭美華
