支聯會上年響尖沙嘴設立全球首間六四紀念館，但開幕冇耐就畀大廈業主立案法團指控違反大廈公契同入伙紙，入稟申請禁制令同索取賠償。不過支聯會話除咗法律觀點，參觀人流、大廈管理以至業戶投訴等都有爭議，所以想審訊時拗埋事實，咁樣對雙方都公平啲。聆案官押後裁決。
被告支聯會嘅法律代表噚日庭上解釋，希望以傳訊令狀（writ of summons）展開訴訟，即係法律同事實都拗，仲會援引專家報告，澄清訪客人流密度唔係好似法團所指嘅咁高。
代表又話紀念館只係陳列室，並非公契同入伙紙訂明禁止嘅展覽館用途。
但係代表原告富好中心業主立案法團嘅資深大狀馮華健就話，係咪違反公契同入伙紙，純屬法律觀點爭議，用原訴傳票（originating summons）形式審理已經足夠。
案件編號：HCMP1037/14