一隊球隊能夠贏得球迷、同行嘅尊重同支持，除咗好成績，球隊嘅風格同球品好重要，但車路士嘅迪亞高哥斯達就冇乜球品，以前踢馬體會嗰陣已經有唔少粗野行為。估唔到踢咗半季英超，更變本加厲，僅餘嘅球品都冇埋。周二英聯盃對利物浦兩次抽水，行為過火，更與謝拉特「鬥晒牛」（圖），好彩英足總已決定秋後算賬。
艾馬喺國際足協嘅頒獎禮曾經問美斯，仲記唔記得細個踢波嘅樂趣。艾馬出身窮困地區，之後成為職業足球員，喺河床同華倫西亞成名；就算經歷多次傷患，艾馬仍記得踢足球唔係為錢或者為勝利，而係為咗樂趣。
足球嘅樂趣在於可以令球迷聚首，唔止係因為佢哋支持嘅球隊贏波，仲包括球員嘅體育精神。而哥斯達一而再、再而三嘅不君子行為，正正違背應有嘅體育精神。但願呢位頂級前鋒，有一日會諗起踢波除咗係為勝利，亦係為咗樂趣，絕對唔應該蓄意去傷害、剝奪他人享受踢足球嘅樂趣。
本周英超有車路士對曼城嘅榜首大戰，但兩隊近況都麻麻，預計雙方都會以小心謹慎踢法為主；入波未必多之外，亦未必咁易分到勝負，我估今場會開出和局，比數就貼1:1啦，大家以和為貴。
文：LULU