做政治家，吹水唔抹嘴係基本要求。中國總理李克強喺禮拜三國務院會議，話要推動鐵路、核電走出去，進軍海外市場。咁仲特止，仲有鋼鐵、有色、建材、輕紡，通通要出去。呢啲全部係中國自己都唔要的落後產能，想搵海外買家做老襯，真係發開口夢。弊在而家內地民族主義咁高漲，又真係大把人信，起碼已經當實現咗一半習總所提出的中國夢政績。
要講將夢想當現實，核電就係最好例子。中央一句核電要出海，整個核電板塊炒完又炒，隻隻核電股爆升。講真，中國核電憑乜進軍海外市場？內地核電站自己都係進口美國、法國技術，開發出來的第三代國產核電機組，連自己都唔敢用，冇一單成功個案，人哋點會有信心？更何況，核電係最講求安全行業，而中國產品予人印象，一向係粗製濫造。
其實產品能否成功打入國際市場，與國家形象有關。中國國際形象一直欠佳，但在內地封閉情況下，民眾並唔知情，反而一路覺得好威，加埋官方宣傳攻勢，好容易自我陶醉，覺得一定掂。
不過，股市需要用真金白銀埋單，過一排等走出去處處碰壁時，到時仲未夢醒的股民，就要為中國夢找數了。
李可強