做得一月之星，練馬師蘇保羅梗要好頭好尾！呢晚係一月份最後一次跑馬，蘇保羅即使返咗祖家新西蘭買馬，但第三場四班一千米都照贏「勇戰」，馬房一月份累積八勝十三位，人如馬名非常勇戰，賽後貌似梁家輝的型男馬主杜達輝笑到見牙唔見眼；梗係啦，自從2012年元旦日「呼風喚雨」後，杜達輝個人名下馬匹等了足足三年才有馬贏。
「勇戰」上次同程拉士塞車追唔切「勝任如意」做二奶，後駒再出連捷，「勇戰」今場路程、場地同配搭(田泰安)一概照舊，就算係改跑最窄之C加3跑道，卻好彩唔再塞車，直路於外叠一衝過晒，彈開近兩身位以無敵姿態補中，取得服役首捷。蘇保羅今季贏到20win，就快殺入練馬師榜三甲，至於田泰安來港兩季，四次參與谷草C加3跑道賽事，次次有馬贏冇斷纜。
呢場落飛黨臨尾賭重四班未贏過之「金威利」，此駒恃住輕磅沿途貼欄領放，拉士雖然一度走甩，但都頂唔住「勇戰」，3.8倍綠燈W開唔到，落飛黨輸到眼坦坦；三、四名分別係跑番最短途之「澤心星」同初出馬「飛霞」。