工商總局噚日發佈長達七千字報告，狂砌阿里巴巴。單睇份報告，會以為淘寶網可以即刻冚檔，因為單單罪名都好嚴重，隨時封舖拉得人。報告裏面話，阿里巴巴存在商業賄賂行為，管理秩序混亂，為無牌經營、商標侵權、虛假宣傳、傳銷、消費侵權提供條件，直斥「養癰成患，面臨成立以來的最大誠信危機」。嘩！堂堂國家級報告用埋呢啲字眼。
畀你係馬雲，會點拆招？其實上禮拜五，馬雲喺瑞士達沃斯發表演講時，已經畀咗答案。佢當時話自己喜歡打太極，最鐘意「你攻上路，我攻下路」。阿里巴巴噚日高調反擊，公開投訴工商總局網監司司長劉紅亮，話佢「程序失當、情緒執法」，一於攻其下路。
馬雲最鐘意睇武俠小說，呢招「乾坤大挪移」，就好成功咁，將爭論焦點由「淘寶有冇賣假貨」，轉化為「你撐工商局，還是淘寶？」呢招真係好使得，事關工商局喺大陸形象好差，被指經常欺壓小商販。馬雲揭竿而起，反而得到唔少網民支持。噚日有網站發起投票，撐淘寶超過四成，撐工商局不足三成，其餘就覺得兩邊都不值得幫。不過，馬雲與中國政府高層關係良好，呢招功力深厚，其他人都好難學。
李可強