【本報訊】去年底，個人地產代理牌照數目減少近五百個，至約三萬五千五百個，但去年全年整體樓宇買賣合約登記，包括住宅、車位及工商舖在內，只有八萬一千五百宗，簡單計算，平均一個經紀只能促成約兩宗交易，僧多粥少下，部份代理為求開單，遂出蠱惑招數。
唔夠數 上司即爆粗
港府出3D辣招後，業主三年內轉讓物業要繳付額外印花稅，令放盤量急降，前線地產代理大呻二手盤源急降，公司捽數之下被迫轉做新盤，紅日返工無補假，由朝企到晚，開唔到單位仲要被上司粗口問候，可謂「苦過dee dee」。
據前線地產代理透露，當月跑唔夠數員工的下場，仍舊會有如早前網絡流傳的短片般，在開會期間被上司不停用粗言穢語對待，部份比較離譜的個案更會辱及家人。
除言語暴力，業內有分早班及晚更兩種工作時間。如果經紀無法促成交易，焗住返早班放晚，工時逾十四小時不特止，打「cold call」、新盤外撲車招攬客人、日曬雨淋更加是家常便飯。遇着大型新盤開售，勞工假期返工無補假更是不成文規定，為交數而一整個月無假放的地產代理大有人在。
■記者陳東陽