【村姑大娛塘】荷李活男星尊尼狄普（Johnny Depp）拖埋未婚妻安芭赫德（Amber Heard）去咗東京，為新片《華麗怪盜》（Mortdecai）宣傳。近年成日做啲神化角色嘅尊尼，個人都越嚟越神化，去過日本十一次宣傳都順利，但前日就突然甩底記招，到夜晚首映又突然好番。據日本傳媒指，大會當時以身體不適為尊尼解畫，不過就懷疑佢其實係飲醉酒！報道仲話尊尼聲稱唔舒服，但都冇叫醫生上門，而且前晚首映受訪時都似有醉意，加上佢早排喺荷李活電影頒獎禮中醉住上台，又難怪被指係因醉酒而甩底。
到噚日，尊尼開記招補數，雖然佢多次為甩底道歉，但講到甩底理由時又再亂噏嘢：「我俾隻吸血怪獸卓柏卡布拉襲擊，我將佢收咗入行李度，大家放心，我已經將佢從二十三樓掟咗落街！」真係癲得勻循。好懷疑尊尼拍完《加勒比醉愛日記》（Rum Diary）抽離唔到鍽色醉到𠵱家。
撰文：李村姑