小米行高「性價比」路線，的確係吸引唔少人捧場嘅，上年仲成功賣出超過六千一百萬部智能手機。今年仲口響響，話要提高銷售目標。唔知小米係咪睇到條數，沾沾自喜以為自己已晉身最受歡迎手機品牌，走去搞個「舊換新」活動，iPhone 5S或更舊款iPhone，唔理好壞，免費換小米Note標準版；如果你係拎iPhone 6或iPhone 6Plus，就可以換小米Note頂配版。知道呢個消息，當堂嚇一跳，然後得啖笑。先講價值，就算我將部舊iPhone賣出去，好可能已貴過小米新機。再者，拎部iPhone 6去換小米，就好似用層Tesla換比亞迪（1211）咁，你話邊個制？
今次小米行動可反映兩個可能性，一係小米唔知道銷量同品牌形象係兩碼子的事。情況就如吳若希首《越難越愛》播到洗腦，但唔等於佢紅。小米賣得好，唔一定代表你有一批忠實粉絲，只係純因為賣得抵。假如小米係賣iPhone價位，可以肯定大家會揀蘋果唔揀佢。菲菲唔信小米咁天真，唔知呢個事實，所以呢單嘢都係博見報機會大，兼夾自抬身價。講到小米概念股，通達（698）一定係第一個。公司股價自十二月起開始逐步反彈，最近亦已突破下降通道，成交配合，短期內有望進一步炒高。更重要嘅係，呢隻股股票號碼啱啱好，踩唔中「689」呢三個數目字。
Fifi
http://www.facebook.com/lovefrystock
本欄逢周二、四刊出