今屆最佳短途馬之爭，現階段公認以「友瑩格」及「幸福指數」呼聲最高，其中「友瑩格」揚威國際賽之後，一直操而不跑，馬主楊毅接受美女賽馬主持Paris陳穎訪問，他解釋愛駒唔跑日前百週年紀念短途盃，並非隻馬有問題，而係1000米唔太合適，將以2月15日1200米主席短途獎為目標，仲表明信心都好大。
楊毅又表示，除咗賽馬之外，自己亦好鍾意足球，一家都係曼聯擁躉；又概嘆香港賽馬長久以來博彩味太濃，自己有幸做馬主，想帶出一個訊息，就係賽馬可以係好健康嘅家庭活動，所以賽日盡可能帶埋兩個囝囝入場，開開心心過一個family day，而愛駒每次出賽前一日，都會一家入馬房餵隻馬食紅蘿蔔，更透露大仔對賽馬已有一啲認識，因為大仔同騎師郭能嘅兒子係同學，大家有共同話題。
至於另一匹愛駒團體馬「比卡超」，楊毅解釋個馬名係拍檔廖舜康女兒改嘅，佢自己亦好喜歡一啲動畫主角及英雄人物，仲話將來嘅新馬，有可能叫Fantastic 4（神奇四俠）！