星級嘅投資銀行賓架賣少見少。外電噚日話，舊年三月先至升任摩通中國投資銀行業務主席嘅龔方雄計劃退休，摩通暫時未公佈繼任人選。
五十歲嘅龔方雄喺二○○四年加入摩根，原先係中國首席經濟師，經常預測中國經濟前景，最爆一次就係佢二○○八年出報告估中央會拎三、四千億出來刺激經濟，當時仲俾人笑佢講得誇，點知幾個月後，阿爺直情拎四萬億出嚟救市，跟住咪人人改口讚龔方雄估得準囉。
龔方雄翌年升做摩通中國投行業務副主席，上司係方方，不過方方忽然喺舊年三月退休，龔方雄就走馬上任做中國業務主席，一年未夠就話退休，認真耐人尋味，事關方方唔做之後，孖屐就傳方方捲入美國監管機構對摩通聘請內地高層子女嘅調查，又話佢俾本港廉署調查，家陣到龔方雄話退休。
華華聽聞，龔方雄對同事講話佢打算退休嘆世界，就係咁簡單喎。