市傳國美（493）大股東兼中國前首富黃光裕出獄在即，曾經做過國美「白武士」嘅美資貝恩資本（Bain Capital），繼上星期沽晒國美股票後，國美噚日又宣佈，兩位貝恩代表辭任董事，代表正式同國美分手了。
國美嘅公告話，竺稼與王勵弘兩位非執行董事，已經離開國美董事局，原因就係例牌嗰一句「需要更多時間和精力處理其他業務」。兩位前董事其實都係嚟自貝恩，負責睇實國美立立亂條數，𠵱家仍然係貝恩資本亞洲董事總經理。
貝恩上星期五沽晒手頭上價值超過十億元嘅國美股票，董事走人都好正常。貝恩二○○九中入主國美，黃光裕第二年因為行賄罪入獄，貝恩就幫手睇住公司盤數；𠵱家功成身退，唔通代表黃總好快返去國美主持大局？