踏入二○一五年不足一個月，貨幣戰爭越演越烈。繼一月中瑞士央行突然宣佈與歐元脫鈎兼減息後，過去兩星期，印度、埃及、丹麥、土耳其、加拿大、秘魯等亦相繼減息。昨日，戰線更由歐美殺到亞洲，新加坡出其不意調低滙率，成為今年以來第九個放寬貨幣政策的國家，真係估你唔到！獅城在南洋燃起烽煙，亞洲貨幣紛紛走軟。不過，昨午泰國、大馬議息後，維持利率不變。至於中國，就唔似會放寬滙率政策，未來多數會透過利率而唔係滙率去支持經濟；從新加坡發表聲明後，人行即調高人民幣中間價，可見一斑。
農曆年後料加票價
隔晚美股跌1.6%，昨日A股亦跌1.4%，港股竟能力挽狂瀾升0.2%，收報24861。今日期指、期權結算，近呢兩日似係托住期指來轉倉，好友死守24800關口。聯儲局一連兩日議息，今日香港時間凌晨三時公佈結果；若聯儲局明示或暗示推遲加息，短線對港股有利，加上25000左右有較多熊證街貨，今日或趁結算突破25000關口，一旦成功可挑戰26000。過多三個禮拜就係農曆新年，春運由下周三開始至三月中，當局預計客運量按年增加3.4%，在道路、鐵路、水運、民航中，鐵路增幅料最勁，達10%。我即刻𥄫吓鐵路板塊，廣深鐵路（525）幾啱心水。雖然我對廣深鐵張二○一四年成績表冇乜寄望，但估計農曆新年後其車票有望加價。
受到內地經濟放緩及鐵路業實施營改增影響，廣深鐵首三季只賺6.5億元人民幣，按年跌33.7%；不過，若單計第三季，純利只跌3%，較上半年顯著改善，第四季可望繼續好轉。大摩月初發表的報告亦指營改增負面影響已正常化。彭博綜合證券商預測，經過上年業績倒退後，今、明兩年可恢復雙位數增長。其實，廣深鐵與港鐵（066）一樣，除了經營鐵路外，仲從事鐵路土地綜合發展，相信可成為廣深鐵未來盈利增長點。廣深鐵去年九月中以來，股價輾轉向上，反映投資者炒業績好轉，憧憬今年可加票價。中金測算廣深鐵對客運票價盈利彈性為3.5，即客運基準票價每加1%，盈利可升3.5%；該行預測票價可加15%，帶動盈利提升53%。
廣深鐵踏入一月後在3.67至4.14元之間三角形整固，期內成交額亦縮減，等消息格局。策略上，現價可買入，若有好消息配合向上突破一月六日兼五十二周高位4.14元，首個目標4.8元；止蝕位3.75元。廣深鐵昨收報3.9元，跌0.76%。
割柑人
http://www.facebook.com/pages/割柑人/677248972358821
本欄逢周四刊登