亞視曙光初現，入行十三年喺亞視訓練班畢業，一直都係擔任兒童節目主持嘅伍偉樂前晚小登科，估不到亞視冇糧出，伍偉樂仍然水頭充足，花費近百萬在金鐘萬豪酒店筵開三十席，有亞視和無綫藝人黃日華、張家瑩、翟威廉、李思欣撐場，而范振鋒就幫手做司儀，陣容可能勁過亞視台慶，但新娘有不少從內地嚟港出席婚宴嘅親朋戚友，令佢哋慘變人肉佈景板。
新娘掛滿龍鳳鈪
伍偉樂話老婆阿Mi唔係圈中人，唔多想佢出鏡，但在微博見到有人放咗佢兩個嘅結婚相出嚟，相入面見到伍太着住套紅色晚裝，頸上面掛滿十幾隻龍鳳鈪同一大塊金豬牌，阿Mi擺明係豪嫁伍偉樂喎！
馮仁昭問伍偉樂亞視拖糧仲可以豪花近百萬結婚？佢好謙咁話要慳住使：「唔係公司有問題都要慳啲，節儉係美德，有錢都留畀老婆使。」日前亞視有人投標，伍偉樂話：「我唔得閒睇新聞，不過有同事話畀我知，咁就好喇見到太陽，亞視營運番都算係雙喜臨門。」
撰文：馮仁昭