之前Tony蔡東豪宣佈三月離開精電（710），當時引起市場好多揣測，其中一個傳聞係話Tony同太子女、即精電老闆高振順愛女高穎欣出現意見分歧，主要係話Tony認為汽車顯示屏有得做，但同樣係投行出身、三月會升做行政總裁嘅太子女就覺得好難再發圍。呢個傳聞唔知真定假，不過精電最近決定賣走一間德國電子配件公司嘅股權就係真嘅。
噚晚精電披露，賣咗德國上市公司Data Modul約兩成股權，套現1.7億元，預期有五千一百萬元純利。Data Modul係精電長期客仔，精電一直有賣液晶體顯示屏畀對方。Tony仲係Data Modul嘅監事會副主席㖭。
咁點解精電要賣佢股份？公告話要加強財務基礎，套現所得會重新分配精電現有同其他適合嘅投資項目，去改善公司利潤，至於可以點樣改善公司利潤？可能下次要問高穎欣喇。