《阿森一族》（The Simpsons）嘅製片人舊年預告會搵Tesla行政總裁馬斯克（Elon Musk）「演出」，呢集上星期六播咗喇。馬斯克仲非常入戲，套劇播放後繼續喺Twitter同主角荷馬個女討論科學！
故事講馬斯克坐住疑似係自己公司SpaceX嘅飛船，降落喺荷馬屋企嘅後花園。馬斯克遇上發明事業上嘅瓶頸位，荷馬嘅廢話連篇竟然就安慰到佢。
荷馬個女介紹馬斯克時，讚佢可能係仍然在世嘅最偉大發明家；但轉過頭，劇情又話馬斯克嘅發明有型但完全冇錢賺，連荷馬最後都決定唔同馬斯克做朋友，因為佢嘅發明唔work。
荷馬個女喺片中質疑馬斯克，既然佢做電動車，點解唔研究用電動推動SpaceX火箭。馬斯克嘅真人之後喺Twitter回應話SpaceX唔可以用電推動火箭，因為動力不足。嘩！討論得好認真，呢位科學家似乎唔記得阿森一族只係卡通片。