成立咗廿三年嘅民建聯，稍後極有可能由女性做主席當家。現任主席譚耀宗前晚喺黨內中委會宣佈，為咗培養新一代，三月唔參選中委，意味放棄連任主席，退位讓賢畀後生仔……同女，但冇講係咪連立法會都唔選。
譚耀宗放棄連任
譚耀宗放棄連任，接班大熱係邊位？唔使問阿貴，都知道係悉心栽培嘅行會兼立會議員李慧琼Starry。但講到底，主席都係經過「選舉」產生嘅，所以Starry噚日回應係咪接班時只稱，等埋中委選舉再講，但表明心迹，如果有人推薦，「我哋不會逃避、亦都願意擔當」。
雖然仲未正式坐正，但唔少立會議員已經當咗Starry係民建聯之首。經民聯林健鋒上前祝賀呢位南海鄉里時大叫「主席，你好」，Starry即時露出尷尬笑容。
自由黨張宇人亦一度上前「扮偷聽」李慧琼受訪，當Starry邀請佢一齊受訪時，張耍手擰頭話：「我又唔係要去選主席」，令Starry不禁大笑。