立法會平日開會期間，都會有人負責招待議員，斟茶遞水、呈文件同文具、幫議員傳紙仔，其實佢哋係立法會嘅管事，而身為立法會最資深嘅管事羅秉義（Tony），做埋今日就退休。六十二歲嘅Tony一九八五年放棄Bartender嘅工作，到立法會任職管事，一做做近卅年，噚日唔少議員同佢影相，公民黨六位議員知道Tony愛運動，送咗件運動外套畀佢。
Tony噚日講明不談政治，淨係話自從立法會搬咗嚟金鐘，地方大咗、吃力咗。佢入職當年只有三至四位管事，家吓已有十四個，認為做管事最重要細心，工作上最難忘議員在任時離世，例如吳明欽、張鑑泉等。