昨日密西比話有芬佬對金發局最新發表的人力資源報告感不滿。無獨有偶，海迪的基金朋友持差不多看法。近年本港基金界過度擴張，大量紅色資本來港設立中小型基金公司，十個民企老闆、五個都開隻fund來炒股。近年求其一間三、四線上市公司開個業績簡報會，都可以有百幾、二百名投資者參與就知。公司當炒的話，逼爆四季酒店大禮堂亦是等閒事。望落業界好景？其實早就外強中乾，想raise新錢已經好難。
隨着大量內地從業員湧港，質素極為參差，僧多粥少下，拉低整個行業薪酬水平。海迪聽過最極端的例子，有Buy-side初級分析員人工連幾萬蚊都無，可能比打份政府工、做中學教師搵得仲少。最近被某美資行裁出來、有ranking的分析員，聞說要割價搵工。所以金發局話行業請唔夠人？真係唔知佢點得出呢個結論。
從內地輸入的究竟真係「專才」，還是純靠關係來港的人？有做中資投行的朋友曾抱怨，最痛苦就是要安排那些官二代、富二代來港做暑期工，唔畀嘢佢哋做又死，畀嘢佢做死得更快。
海迪