金融界真係有好多乜會物會，新近又話有個「香港國際投資總會」將會於明日（周四）正式宣佈成立，圈內暫時對呢個會所知不多，特別之處，呢個會係由「梁粉」陳啟宗擔任執行委員會主席嘅香港明天更好基金，連同中國國際商會投融委共同發起設立。
根據資料，香港國際投資總會啱啱喺舊年十二月登記成立，話希望促進中港兩地嘅投資合作，為國際同中港政府、金融機構、企業精英提供高端嘅交流平台，發揮中央與特區政府商界智囊團作用。呢個會有兩位主席，分別係城開（北京）投資集團董事長余延慶同埋香港明天更好基金理事鍾志平。
其實香港𠵱家已經有唔少乜乜物物委員會、智囊組織，多一個，少一個好似都冇乜關係，大眾最關注就係一大堆人畀完意見之後，有冇人可能落實執行到啫。