CEC國際（759）旗下阿信屋越開越雜，零食、百貨、麵店、賣衫乜都有，位於牛頭角樂華邨嘅新成員「759麵包工房」最近亦已開業，做街坊生意，華華八卦走去試食，發覺水準一般，不過都係預期之內，事關凡事都講專心、專業，尤其係食肆，唔係話租到個舖，搵齊師傅就一定正。
阿信屋一向走平民路線、產品價錢唔貴，呢間759麵包工房嘅麵包單價介乎五至八蚊，普通菠蘿包、雞尾包賣五蚊，賣相與口感一般。
搵埋留家廚房主理人兼飲食專欄作家劉晉試食，佢話，整體嚟講，摸唔清究竟呢間舖係想鬥平，還是鬥靚，市場定位太模糊。
劉晉話，以往見過唔少從事食品貿易嘅商人走去搞飲食，一心諗住拎到較平價嘅食材就天下無敵，結果通常出事，事關餐飲業十分專門，由食品控制、服務到諗新菜式，都要有專業團隊配合。阿信屋一時間開咁多唔同類型嘅食肆，劉晉都質疑佢咁樣好難做得好。
