剛過去的周日是一月二十五日，若果你是紅魔迷，還記得廿年前這天發生何事？沒錯，就是簡東拿在對水晶宮一役飛踢球迷那天（圖）。英國廣播公司日前採訪了幾位在案發現場的人士，憶述當時情況。例如曼聯保安總管基利，他護送被逐的簡東拿離場，場邊的「皮褸男」森蒙斯一直喪鬧，本來大帝見慣世面當無事，但當森蒙斯爆出：「你阿媽係法國妓女！」就此令大帝忍無可忍！「話我點都得；話我屋企啲女人就唔得！」咁似施丹頭槌撞人心口嗰幕嘅？唔通好波啲嘅法國男人，都係咁保護身邊嘅女人？真係Man！
如將費格遜的曼聯劃分為四個王朝，簡東拿肯定是第一王朝的標誌人物；跟着是以碧咸為首的七小福時代；然後是二千年初的C朗時期；最後到朗尼領軍。其實，我就是因為簡東拿而愛上曼聯，甚至因他而愛上足球；論妙絕入球，碧咸、C朗、朗尼都有唔少；不過，講到那份瀟灑、那桀驁個性，還有其欷歔嘅鬚根、憂鬱嘅眼神……總之，廿年之後，一樣無可取代！講番對水晶宮嗰場波，後衞美爾憶述因自己mark唔實修夫基被頂入，之後就被費Sir「開風筒」；簡東拿起飛腳搞到停賽八個月，費Sir反而鬧球證點解任佢被人踢先搞到佢失控？費Sir可以踢走碧咸、賣走C朗、雪藏朗尼，但原來佢同球迷一樣，唯獨偏心簡東拿。
方栢翹
now足球評述員