所謂「薑係老嘅辣」，喺周二嘅澳網女單兩代美少女大戰中，賽前獲選最佳戰衣嘅舒拉寶娃就幫二十歲嘅寶查上咗寶貴一課，以2:0輕鬆勝出，殺入四強。不過好彩寶查勝在兵多，喺出局之後即刻有澳洲奧運腳喺twitter度同佢求婚，絕對係輸人唔好輸陣。
二十七歲嘅舒娃喺呢場靚女戰中，只係用咗七十八分鐘，就以2:0擊敗寶查，而且舒娃嘅深粉紅色戰衣仲俾《體育畫報》（SI）評選今屆賽事最佳戰衣之一，表面上真係乜都贏晒。佢賽後亦好風騷咁話：「我由比賽開始已經得心應手，而且全程都保持專注，我對自己嘅表現都好滿意。」而最差衣着就係二○一二同埋二○一三年奪得澳網女單冠軍嘅艾莎倫嘉。
寶查出局澳職前鋒求婚
不過，由於舒娃已經名花有主，同保加利亞球手狄美托夫甜甜蜜蜜，所以就唔夠落敗嘅寶查有咁多小蜜蜂。原來，效力FC悉尼嘅澳洲奧運腳前鋒哥利加美路都係「Genie Army」嘅成員，喺寶查出局後，佢就立即喺社交網頁twitter度呵番寶查BB（下圖），佢話：「寶查喺澳網出局，真係衰！我最鍾意嘅網球手，希望呢條tweet可以搵到你啦，我𠵱家向你求婚，嫁畀我好嗎？」公然向女神求婚，認真大膽！
拿度爆冷不敵貝迪治
講番男單賽事，雖然西班牙球手拿度嘅戰衣亦同樣被評為最佳，但佢喺男單8強，就爆冷以直落三盤輸咗畀捷克嘅貝迪治，而拿度賽後亦承認，由於之前又割盲腸又受傷，所以影響咗備戰。
至於喺今日嘅賽事（now670台今日8:00am起直播），大家嘅焦點相信會喺日本「網球王子」錦織圭鬥衞冕男單冠軍嘅華域加嘅半準決賽。另外，鍾意品評球手衣着嘅球迷，就要留意大細威分途出擊嘅女單半準決賽，因為喺大威被評為最差戰衣之一嘅同時，佢妹妹莎蓮娜嘅露背裝，則被評為最佳戰衣之一。
識睇，一定係睇足英台【英波Live】：
http://soccer.appledaily.com
http://bit.ly/engballlive