楊千嬅紅館演唱會前晚進入第三場，郭富城做壓軸嘉賓，仲同全場粉絲大合唱《對你愛不完》，又同千嬅鬥舞技，大跳《狂野之城》，不停扭籮，氣氛勁爆，原來千嬅之前租咗城城間排舞室秘密練舞，先至敢喺「舞台王者」城城面前班門弄斧，但因為千嬅嘅勤力同認真，就得到城城嘅力讚。千嬅亦回敬高帽勁讚城城：「佢係我好尊敬嘅藝人，我現場睇佢每個騷都好有力量，作為後輩，我要好好學習。」
以為撞邪嚇到大嗌
之後千嬅又講到早兩日屋企發生咗靈異事件，佢話：「早兩日老公（丁子高）要跑馬拉松一早就瞓，我坐喺床尾地下聽歌記歌詞，原來佢拍咗我十五分鐘，我一直自言自語搖頭擺腦，聽唔到佢嗌我，佢以為我撞邪，所以當我擰轉頭時，嚇到一齊大嗌。」另外，丁子高噚日喺西九龍出席活動，問佢係咪促成千嬅同容祖兒世紀合唱？佢話：「佢哋私下係朋友，過年祖兒會嚟拜年仲畀利是Torres。」
撰文：馮仁昭