既係同鄉，又係愛將，當雲高爾入主曼聯後，可能尹佩斯都以為自己會有好日子過，可以安心喺奧脫福過埋職業生涯嘅晚期，但呢位三十一歲荷蘭前鋒話，擔心下年約滿後會俾踢走。
二十場入八球表現跌watt
尹佩斯同曼聯份約去到出年夏天，但仲未有續約消息，佢喺禮拜一接受訪問嗰陣話自己今季入波唔夠多，唔知有冇得續約：「呢啲唔到我話事，𠵱家我只係知，我仲會喺曼聯留多十八個月。我真係預測唔到未來，唔知之後會發生咩事，我哋只可以耐心等候。老實講，我哋今季入得唔夠多波，每個人都要負責，而我當然都要啦。我想入多啲波，喺每日嘅訓練同比賽，我都會全力以赴。」雖然尹佩斯係兩屆英超神射手，但佢近兩季傷病都幾多吓，入球率亦下降，今季喺英超上陣二十場入八球；歲月催人老，尹佩斯嘅身體對抗性跌得好快，到約滿嗰陣三十三歲，相信到時跌得仲勁，曼聯未同佢傾續約都有道理。
雲帥愛將史杜特文又傷
講開雲高爾愛將，除咗尹佩斯之外，仲有羅馬嘅荷蘭中場史杜特文。雲帥想買佢已經唔係新聞，如果史杜特文上年唔係重傷的話，相信曼聯舊年夏天已經出咗手。上年底終於等到史杜特文好番，但喺周日羅馬對費倫天拿嘅意甲，佢膝部受傷退下火線睇個勢應該冬季轉會窗都冇可能去到曼聯喇。
不過我求大俠都仲記得，曼聯今個月其實簽咗個歐聯冠軍級人馬，就係前巴塞隆拿門將域陀華迪斯（VV）。周一晚，VV代表曼聯U21對利物浦，係佢首次為紅魔披甲，雖然失咗一球，但曼聯靠尼克包維同麥尼亞各入一球，以2:1贏波。另外，曼聯喺英足盃第五圈抽到好籤，重賽贏到劍橋聯的話，對手會係錫菲聯或普雷斯頓，兩隊都只係英甲隊。
識睇，一定係睇足英台【英波Live】：
http://soccer.appledaily.com
http://bit.ly/engballlive