講開又講，𠵱家香港都越來越多人用小米，聽聞，香港「米粉」就快有得在港「潮聖」嘞，小米專門店「小米之家」計劃喺今年第二季落戶香港。
小米之家嘅裝潢一向俾人話勁似蘋果專門店，店舖面積亦有番咁上下大，米粉到時唔好行錯喇。消息人士唔肯透露租咗舖未，但係睇佢首度來港開舖，頭威頭勢，斷估點都會選擇喺旺區開番間大舖啩，唔係點樣製造氣氛呢？
除咗計劃在港開設專門店，小米今年亦會連續第二年在港舉行「小米爆米花」派對，舊年佢哋首次舉行呢個派對，有超過五百名米粉參與，仲搵到賭王四太梁安琪站台撐場，四太有幫襯之外，仲大讚小米產品好用，幫晒手宣傳㗎。小米見香港米粉咁熱情，於是今年再接再厲。