今屆打吡報名馬中，評分最低係苗廐「由心出發」，報名嗰陣先得57分係四班馬身份，就算上場贏咗，家陣亦只不過63分三班尾，網上有人話「由心出發」不自量力，根本零機會入選。
其實睇番苗廐過去兩匹打吡冠軍「勝利名駒」及「雄心威龍」，都響較低班贏上去，尤其「雄心威龍」，當年季初贏四班時，邊個諗到五個月後佢可以喺打吡稱霸？所以姑勿論「由心出發」最終能否攞到打吡入場券，既然苗禮德幫佢報得打吡，某程度上反映隻馬嘅潛質相當高。
睇番「由心出發」，上仗乃休息近四個月後傷癒復出，當日加程上陣，排A欄1400米勝出率極低嘅2檔，末段又差啲冇位上，仍能以極強爆發力衝贏對手，馬主陳志話根本難度極高。今次繼續配雷神，騎練今季合作18次5冠7亞3季1殿，得兩次唔入前四名，而隻馬嘅同母姐姐贏至2200米，所以「由心出發」今期(28號)增程初跑一哩冇話唔掂，就算冇份跑打吡，估計將來亦極可能係一二班馬。