深圳上市只有兩日的券商股申萬宏源，昨日大跌9.8%，仲一度跌停板，真係嚇親唔少內地股民，亦成為拖低大市原因之一。呢排乘市旺，券商股狂抽水，不斷集資、配股，大股東都減持，但之前A股仲可以頂住。而家申萬宏源上市後股價只升一日咁短癮，市況分明有燶味。
對比同樣喺深圳上市的國信證券遭遇，已經話到明，而家來到水尾。國信證券去年十二月二十九日上市後，連續十二日升停板，氣勢如虹，喺一月十六日「一一九」大跌前，成為深圳股市市值最高股份。申萬宏源周一上市，同樣一開始升停板，搶咗深市市值一哥位置，但到第二日就跌停板，差天共地。
以市值計，券商股龍頭係上海上市的中信証券，但大股東極度睇淡，已經畫公仔畫出腸。之前喺一月十六日晚上，突然宣佈已掟3.48億A股，套現過百億元。跟住又宣佈，發十五億H股新股，散水有咁快得咁快。
而家內地股民最驚係，深市市值最高的申萬宏源，唔會成為當年中石油上市翻版，成為跌市凶兆。二○○七年十一月中石油A股上市，股價第一日就由十六元（人民幣．下同）爆升到四十八元，但第二日就開始下插，跌足幾年，拖冧大市。
李可強