近日港股悶悶哋，但係喺藍籌股輪流升之下，恒指唔覺唔覺上番接近25000。喺二○一○年十一月、二○一四年九月，恒指都見過25000附近，過去呢兩次去到25000大家都異常興奮，預測大市突破25000關之後，港股進入大升市，結果……簡單啲講，當時投資者太興奮，一次過耗盡購買力買港股，結果承接力唔夠，就掉頭下跌，兩次破頂都失敗收場。
成交暢旺 推高盈利
今次去到25000點，大家仍然保持審慎，一嚟坐貨唔算多，二嚟問好多人都話睇唔通個市，咁即係反映港股潛在購買力仍然存在，大家仲有空間去掃貨，所以港股真正破頂機會正在增加。藍籌輪流升，連中移動（941）、騰訊（700）都破頂，硬係計漏咗一隻，就係港交所（388）。
一月到而家，港股成交保持住有一千億元左右，噚日靜少少，成交都有八百三十七億元。比在喺前兩年，呢啲成交要港股進入火熱狀態先至出現。換言之，港股交投已經唔覺唔覺升呢。
成交高咗一截，業績同成交額同步嘅港交所理應最受惠，論條件絕對有能力破頂。如果成交保持落去，券商肯定要調高港交所盈利預測同目標價，摩根大通就曾經估計過，如果港股日均成交去到一千億元，港交所每股盈利就達到6.61元，以市盈率中位數34.5倍計，股價可以值二百二十八元。你話貴？港交所貴係常態，一嚟派息比率高，二嚟受惠大陸水喉，三嚟經營成本極低永無蝕錢，四就唔好再問點解。
舊年三月去到八月，因為滬港通嘅消息，令港交所由一百一十元升到去一百八十元，跟住橫行到十一月，滬港通開通先知效果遠遜預期，跟住跌破一百七十元之後冇耐就見底。你以為佢冇咗滬港通消息會唔掂，佢就係唔跌，到而家keep住一百八十元左右，皆因大家發現即使冇滬港通，港股成交一樣可以回升至千億元水平。
近期升市大家都覺得難炒，上星期一以為係大跌市，原來係大震倉，連股壇高手都被玩謝。既然難玩，就要做最簡單嘅事，港交所似乎係出路。無論睇圖、睇基本因素，港交所永遠係嘅最簡單、最易睇、最易炒嗰隻，仲易過玩A股ETF，升市又永遠唔會令你失望，點都同大市同步。
睇埋個圖，港交所噚日成交亦開始增加，突破一百八十元之後，睇圖做咗個杯柄形態，中長線利好，而家唔排除係上車最後機會，短線先睇二百元，中線睇二百二十元，跌破上星期一低位173.6元止蝕。
晉佳
http://www.facebook.com/pages/晉佳/719009541518415
本欄逢周二刊出