慈母之首曾偉雄話過香港係全世界最安全城市之一，但《經濟學人》最新安全城市指數排行榜中，香港只係排第十一，衰過新加坡、紐約等。究竟係好似藍絲所講佔領搞衰香港，定係因為慈母「保護」示威者有功？報告兩樣都冇提，反而係交通意外同居住環境累事。
「城市貧民區」拖累
呢個安全城市指數評估全球五十個城市嘅數碼、衞生、基建同個人安全四方面表現，總分頭三甲係東京、新加坡同大阪。香港喺數碼安全同個人安全表現唔錯，排第四同第六，不過喺衞生只係排第十五，基建仲差，排第四十，即係尾十。
報告嘅基建安全單元特別用香港做例子，話香港道路系統質素其實名列前茅，但交通意外同行人死亡宗數喺五十個城市入面只係屬於中等，而且有相當數量人口仲住喺城市貧民區，所以拖低晒總分。