施政報告其中一個重點，就係要振興本地電影發展。作為專責官員嘅商務及經濟局局長蘇錦樑Greg蘇都不敢怠慢，即時做嘢推動吓。例如喺出訪日本前，專登去參觀電影《一念無明》嘅拍攝工作。其實呢套電影係其中一部獲創意香港「首部劇情電影計劃」資助嘅大專組電影，目的係發掘同培育具潛質嘅電影製作人才。Greg蘇視察時都好留心，坐埋一邊睇吓班後生仔，做嘢到底有幾咁認真。
唔知平時執到一絲不苟嘅佢，幾時粉墨登場做主角，谷吓人氣兼票房？八方有此想法，無非因為Greg蘇似乎幾有表演慾，好似早前佢參觀授權展，更即興製作一條短片，化身主持訪問番攤位人員，過足主持癮。Greg蘇話呀，條片係佢嘅idea嚟㗎，由於拍得有啲匆忙，如果有不善之處，請多多包涵。而身在日本訪問嘅佢，同日本熱爆組合Generations from Exile Tribe合照時，擺晒pose鬥chok，隨時攞到最佳男主角。