若要數無綫新聞嘅靚女主播，八方相信周嘉儀（圖）嘅粉絲數目，肯定稱冠，至今都係高登仔至like嘅「新聞女神」。但嘉儀BB原來遲啲會告別無綫，以後冇咗嘉儀BB同大家講早晨，高登仔會唔會唔肯起身？
八方聽聞，十年前喺無綫由記者仔做到女神級主播嘅周嘉儀，近日已向公司請辭，但幾時last day，轉行抑或嫁人，一概神神秘秘。一班粉絲當然最想佢好似前同事柳俊江同伍家謙咁，做自由人搵真銀，兼喺幕前繼續亮相，等大家仍然可以見到佢嘅標致樣。
文采BB頂上大熱
可能好多人會問，嘉儀BB點解離開TVB呀？八方同袁志偉一樣，唔係人哋肚裏面條蟲，真係冇答案，但佢喺二○一三年三月同已婚上司許方輝傳緋聞後，據聞已有離職打算，唔知係咪覺得風頭火勢唔合適，延至𠵱家先有最後決定。而高登仔最關心嘅，莫過於邊個接替佢做晨早新聞主播？八方聽聞另一位高登女神文采BB，係大熱之選。