學聯秘書長周永康（Alex）噚日出席關於港大學生會退出學聯嘅公投論壇，有別於八方之前喺佔領區見佢嘅四眼鬚根滄桑look，Alex改戴隱形眼鏡、青靚白淨咗，佢笑言係趁新年改改形象喎。學聯嚟緊就轉莊，Alex早前都講過，落莊後希望專心學業，年底仲可能離港去外國繼續升學。
料今年十二月港大畢業
Alex目前喺港大主修比較文學及社會學讀緊四年級。既然佔領算係暫告一段落，佢都要勤力讀書，追返啲學分，預計今年十二月左右就畢業。唔少人估佢畢業後可能從政、甚至參選，但佢噚日向八方透露，打算繼續升學，𠵱家諗緊去外國讀博士課程、定留喺香港先讀完個碩士研究生課程先再算。佢笑言，預咗到時去外國讀書，又會俾人話佢去勾結外國勢力喇。但係特首梁振英三個仔女，都係讀番書㗎喎，八方斷估下一份施政報告，唔會將Alex去外國讀書一事，當作學聯勾結外部勢力嘅「證據」啩？
Alex同學聯副秘書長岑敖暉（Lester）喺佔領期間，經常出雙入對，唔少人笑言二人「能成為密友大概總帶着愛」，被戲稱「Alexter」、成立「HEHE團」。今次Alex出走，八方相信除咗一班hehe團友以及女粉絲，最唔捨得嘅，肯定係同Alex手挽手走過催淚歲月嘅Lester嘞！
李八方
mailto:[email protected]