日本女團AKB48呢幾年威盡藝能界，雖然有雜誌公佈咗最希望今年消失藝人嘅投票選舉，AKB唔好彩被選為No.1，但係佢哋依然狀態大勇，仲宣佈會組成一隊以新潟縣為發展基地嘅全新師妹組合NGT48，3月開始會招收第一期成員，NGT48劇場仲家好10月會喺新潟縣開幕。
計計吓AKB家族先後已有SKE48、NMB48、HKT48，幾隊同類組合如果稍一落後，隨時會被淘汰，來自大阪嘅NMB會喺3月31日出全新單曲，今次竟然同SKE新單曲同日對撼，身為NMB波霸成員嘅渡邊美優紀，自然要挺起胸膛踏上戰場。
21歲嘅美優紀早前有幸出單飛處女碟，可惜反應一般，最高只排銷量榜嘅第四位，美優紀都知自己歌藝唔多掂，D Cup上圍始終係佢嘅最強武器，所以佢最近又為雜誌拍攝水着寫真，仲以多款唔同三點式盡晒爆乳身材。